Olimpiya çempionu Hidayət Heydərov qonağımız olub. “Neftçi” Futbol Mərkəzində klub rəhbərliyi, baş məşqçi və futbolçularla görüşən cüdoçu Misli Premyer Liqasının “Qarabağ”la 15-ci tur oyunu ərəfəsində “ağ-qaralar”ın məşqini izləyib. Komandamızın üzvləri ilə söhbətləşən Hidayət Heydərov uşaqlıqdan “Neftçi” azarkeşi olduğunu deyib, komandamıza dəstək nümayiş etdirib və uğurlar arzulayıb.

2024 Yay Olimpiya Oyunlarında qızıl medal qazanmış, dünya və dördqat Avropa çempionu olan Heydərov dekabrın 1-i saat 19:00-da “Neftçi Arena”da keçiriləcək “Qarabağ”la matçda komandamızı tribunadan dəstəkləyəcək.