“Neftçi”nin qadın futbolçulardan ibarət komandası UEFA Çempionlar Liqasının birinci mərhələsində bu gün ilk oyununu keçirib. Baş məşqçi Siyasət Əsgərovun yetirmələri Avstriyanın “Sankt-Pölten” klubu ilə qarşılaşıb. Gürcüstanın Tsxaltubo şəhərində təşkil olunan matç “ağ-qaralar”ın 0:5 hesablı məğlubiyyəti ilə nəticələnib.

Bununla da ikinci mərhələyə adlamaq şansını itirən “Neftçi” ilk mərhələdə 3-cü yer uğrunda oyuna çıxacaq. Sentyabrın 7-də rəqib Albaniyanın “Vlajniya” klubuna 0:3 hesabı ilə uduzan Gürcüstan “Lançxuti”si olacaq.