2024/25 mövsümündə “Neftçi”nin geyinəcəyi hər üç forma klubun zəngin tarixinin müxtəlif dövrlərindən və komandanın bağlı olduğu dəyərlərdən ilhamlanıb.

Ev dəstimizin tərtibatı zamanı köynəyin çiyin və V-şəkilli boğaz hissələrində komandamızın 1976-77-ci illərdə istifadə etdiyi formanın elementləri əsas götürülüb. Yeni oyun formamız Anatoli Banişevski və Səməd Qurbanov kimi “Neftçi” əfsanələrinin də geyindiyi dəstlərin retro cizgilərini daşımaqla yanaşı, müasir dizayn tendensiyalarına uyğun hazırlanıb.

Səfər dəstimizdə 1990-cı illərə göndərmə var. 1998/99 mövsümündə finalda “Şəmkir” üzərində qələbə qazanan “Neftçi” qara üfüqi zolaqlı sarı formada Azərbaycan kubokunu başı üzərinə qaldırmışdı. Yeni dəstlərimizdə də məhz həmin formanın cizgiləri özünü aşkar göstərir. Sarı rəng şəhərimiz üzərində il boyu parlayan günəşi, qara rəng isə adımızı da götürdüyümüz nefti simvolizə edir.

Alternativ dəstimizin rəngləri və elementlərində iki amil ilham mənbəyi olub: “Neftçi”nin 1979-cu il SSRİ Güclülər Dəstəsində geyindiyi forma və komandamızla ayrılmaz şəkildə bağlı olan – doğma Bakımızın da qoynunda yerləşdiyi Xəzər dənizinin Bakı buxtasının işıqları fonunda parlayan tünd göy rəngli suları.